有朋友問我最近忙唔忙，我總係鍾意答佢「唔忙，不過仲有好多嘢等住我去做！」反正即使我話我有幾忙都好，身邊嘅朋友總會爭住話……
「我忙啲！」
「都話我忙啲囉！」
「你咁樣邊夠我忙呀！」
然後大家就會好盡情咁各自炫耀自己有幾忙有幾多嘢做！不過都好明顯唔同人對「忙」都會有唔同定義，而總括嚟講，「忙人」通常都會有以下特徵：
- 即使放工返到屋企已經好累，都唔肯上床休息，覺得點都要搵啲嘢做輕鬆吓先，結果上網上到半夜1、2點先瞓
- 可以準時收工嘅時候，會有內疚嘅感覺
- 即使放緊假，或者已經放咗工都好，仍然喺屋企做緊公司嘢
- 經常都要趕deadline
- 同班朋友走埋一齊嘅時候，話題仲係離唔開自己有幾多嘢做
- 會成日都想買嘢獎勵自己，唔覺唔覺買多咗嘢，到月尾唔夠錢駛
- 明明仲好年輕，但係就好冇記性，成日唔記得交電話費，保險供款等等
對我嚟講，冇得出去玩嘅時候就叫做忙啦！好彩到目前為止唔多咁嘅經歷。正所謂「Play hard, Work hard」，如果忙到連休息和享受生活嘅時間都冇，又或者有出現3個或以上「忙人」特徵嘅話，就要諗清楚自己工作嘅目的喇大忙人！
